દેશ
રાજસ્થાનમાં 13 નવી લોકસભા બેઠકો બનાવવાની તૈયારી, કુલ બેઠકોની સંખ્યા 38 થવાની શક્યતા
રાજસ્થાનમાં 13 નવી લોકસભા બેઠકો બનાવવાની તૈયારી, કુલ બેઠકોની સંખ્યા 38 થવાની શક્યતા જયપુર/બાડમેર: રાજસ્થાનમાં લોકસભાની બેઠકોની સંખ્યા હાલની 25માંથી વધારીને 38 કરવાની ભલામણ કરવામાં આવી હોવાનું જાણવા મળે છે. પ્રધાનમંત્રીની આર્થિક સલાહકાર પરિષદ (EAC-PM) દ્વારા તૈયાર કરાયેલા પરિસીમન અભ્યાસના આધારે આ સૂચન કરવામાં આવ્યું છે. જો આ ભલામણ અમલમાં આવે તો રાજ્યમાં 13 નવી લોકસભા બેઠકો ઉમેરાશે. અહેવાલ મુજબ રાજ્યની 7 લોકસભા બેઠકોને બે અથવા ત્રણ ભાગમાં વહેંચીને નવી બેઠકો બનાવવાનો પ્રસ્તાવ છે. જેમાં જયપુર, જયપુર ગ્રામિણ, જોધપુર, ઉદયપુર, સીકર, બાંસવાડા અને બારમેર બેઠકોનો સમાવેશ થાય છે. જ્યારે બાકીની 18 બેઠકોમાં કોઈ ફેરફાર ન કરવાની ભલામણ છે. અહેવાલમાં જણાવાયું છે કે જયપુર, જયપુર ગ્રામિણ, જોધપુર, ઉદયપુર, સીકર અને બાંસવાડા જેવી કેટલીક મોટી બેઠકોને ત્રણ ભાગમાં વહેંચી શકાય છે. આ બેઠકો પર હાલમાં ભાજપ તથા કોંગ્રેસના સાંસદો પ્રતિનિધિત્વ કરે છે. અનુસૂચિત જાતિ (SC) અને અનુસૂચિત જનજાતિ (ST) માટે અનામત બેઠકોની સંખ્યામાં પણ વધારો થવાની શક્યતા છે. જોકે હાલની કોઈપણ SC અથવા ST અનામત બેઠકને તોડવાની ભલામણ કરવામાં આવી નથી. અહેવાલમાં અપનાવવામાં આવેલા મુખ્ય માપદંડ વસ્તીના પ્રમાણને મુખ્ય આધાર બનાવાયો છે. લોકસભા અને વિધાનસભા ક્ષેત્રોમાં સંતુલન જળવાય તેવો પ્રયાસ. એક વિધાનસભા વિસ્તારને બે અલગ-અલગ લોકસભા ક્ષેત્રોમાં ન વહેંચવાનો સિદ્ધાંત. જિલ્લો અને તાલુકાની ભૌગોલિક એકતા જળવાય તેનું ધ્યાન. રાજસ્થાનમાં છેલ્લે 1977માં લોકસભાની બેઠકો 23થી વધીને 25 થઈ હતી. ત્યારબાદ થયેલા પરિસીમન છતાં બેઠકોની સંખ્યામાં વધારો થયો નહોતો. હવે નવા પરિસીમન બાદ રાજ્યમાં કુલ 38 લોકસભા બેઠકો થવાની શક્યતા વ્યક્ત કરવામાં આવી રહી છે.
